Mennska og sjálfræði

Abstract

Í síðasta fyrirlestri fjallaði ég m.a. um gildi, margbreytileika, mennsku og stimplun. Af þessum viðfangsefnum má kannski segja að mennskan sé grundvöllurinn: það er vegna mennsku okkar sem sum gildi eru mikilvæg, margbreytileikinn endurspeglar ólíkar birtingarmyndir mennskunnar og stimplun eða stigma er leið samfélags til að láta í ljósi viðhorf um skerta eða spillta mennsku. En hvað er þessi mennska? Getum við talað um einhvern kjarna eða grundvallandi einkenni? Og svo viljum við væntanlega einnig velta því fyrir okkur hvort þessa mennsku megi rækta, bæta, efla, auðga – það er ekki augljóst með hvaða orðfæri er viðeigandi eða gagnlegt að tala um þessa hluti.