Viðhorf verðandi mæðra til munnheilsu á meðgöngu : reynsla af munnkvillum og forvörnum

Abstract

Markmið rannsóknar er að meta almenna þekkingu barnshafandi kvenna á samspili munnheilsu og meðgöngu, reynslu þeirra af munnkvillum og uppruna fræðslu um munnheilsu. Í þessari þversniðsrannsókn var notast við megindlega aðferðafræði. Rafrænn spurningalisti var hannaður með Google Forms. Óskað var eftir þátttakendum úr opnum og lokuðum hópum verðandi mæðra á Facebook og vonast eftir snjóboltaúrtaki. Gagnavinnsla fór fram í Excel töflureikni, tölfræðiforritunum R Studio og Jamovi. Alls tóku 300 konur þátt í rannsókninni, flestar á aldursbilinu 21–39 ára (94%, n=280), meirihluti hafði lokið háskólanámi (61%, n=182) og voru staddar á öðrum eða þriðja þriðjungi meðgöngu (89,6%, n=268). Meirihluti taldi að hormónabreytingar gætu aukið áhættu á munnkvillum (93,5%, n=275), færri voru sammála því að aukin hætta væri á tannskemmdum á meðgöngu (49%, n=146). Rúmlega helmingur svarenda hafði fundið fyrir blæðingum úr tannholdi (56,5%, n=169), minna bar á öðrum einkennum. Fáar höfðu fengið fræðslu um munnheilsu á meðgöngu (22,8%, n=68) og meirihluti taldi þörf á aukinni fræðslu (94,3%, n=279), þar nefndu flestir að munnleg fræðsla í Mæðravernd væri æskileg (80,4%, n=229) og fræðsluefni á vefnum (55,8%, n=159). Rannsóknin leiddi í ljós að einhver þekking er meðal verðandi mæðra á tengslum munnsjúkdóma við orsakir og áhættuþætti. Niðurstöður bentu einnig til þess að efla mætti fræðslu frá heilbrigðisstarfsfólki, þar sem mjög fáir nutu slíkrar leiðsagnar. Þátttakendur töldu að fræðslustarf um munnheilsu á meðgöngu ætti heima í Mæðravernd og æskilegast væri að ljósmóðir veitti ráðgjöf munnlega. Með þverfaglegri samvinnu tannlækna og starfsfólks Mæðraverndar mætti koma til móts við óskir verðandi mæðra og skipuleggja forvarnarfræðslu um mikilvægi góðar munnheilsu á meðgöngu.