Góð stærðfræðikennsla og bragur í kennslustundum : Sýn nemenda í framhaldsskólum

Abstract

Greinin lýsir rannsókn á hugmyndum nemenda í framhaldsskóla um hvað einkenni góða stærðfræðikennslu. Lagðar voru opnar spurningar fyrir 106 nemendur í sex hópum hjá fimm stærðfræðikennurum í fjórum framhaldsskólum þar sem kennt var námsefni náttúrufræðibrautar. Spurt var um hverja nemendur telji helstu kosti kennara síns. Nemendur allra kennaranna töldu til helstu kosta kennara síns að hann skýrði vel út, kynni stærðfræði vel og væri vel skipulagður, en annars voru persónulegir eiginleikar svo sem þolinmæði, glaðlyndi og umhyggja fyrir nemendum mikils metnir. Athugasemdir um einkenni góðrar kennslu hjá hinum ólíku kennurum báru vott um ólíkan brag, nánar tiltekið mismunandi félagsleg viðmið og ólíkar hugmyndir nemenda um hlutverk sitt og annarra, þar með töldum kennarans, í kennslustundum og um almenn einkenni stærðfræðilegrar virkni.