Lagaþankar: safn greina um réttarframkvæmd og lögfræði frá ýmsum tímum

Abstract

Í þessari bók eru saman komnar allnokkrar greinar, er varða efni, sem á einn eða annan hátt snertir lög og lögfræði, en þó með mismunandi nánum tengslum við hefðbundnar greinar lögfræðinnar. Um margt er efnisvalið með frjálslegra sniði en venjan er um hefðbundna þætti, sem snúa t.d. að laganemum í námi þeirra. Ýmsar greinanna eru sögulegs eðlis og fjalla um áhugaverðar menningarminjar, er snerta lögfræðina, réttarframkvæmdina og sögu háskólanna. Allar eru greinarnar til orðnar eftir að ég lét af starfi mínu sem prófessor við Lagadeild Háskóla Íslands haustið 2014 og vænti ég þess að þær endurspegli ýmis áhugamál mín, er lögfræði tengjast en sem ég hafði aldrei tök á að huga mikið að meðan ég gegndi starfi mínu og daglegar skyldur kölluðu sífellt á orku og tíma. Allt frá starfslokum mínum hef ég notið þess að eiga vinnuafdrep í Lögbergi, mínum gamla vinnustað (þótt með öðrum hætti sé en fyrrum), og færi ég Félagsvísindasviði og Lagadeild þakkir fyrir þá aðstöðu.