Samantekt um kennslu á sviði öldrunarfræða við háskóla á Íslandi

Abstract

Breytingar í aldurssamsetningu þjóðarinnar eru samfélagsleg áskorun sem kallar á samræmdar aðgerðir til lengri tíma. Aldarafmælissjóður Háskóla Íslands veitti Félagsráðgjafardeild HÍ styrk til þess að taka saman upplýsingar um kennslu á sviði öldrunarfræða við alla háskólana á Íslandi. Tilgangur þessa verkefnis er að kortleggja hvaða menntunarmöguleikar og námskeið eru kennd eða í boði við háskólana í landinu. Verkefnið var unnið af Guðrúnu Björk Reykdal, félagsráðgjafa MA. Í bakhópi þess voru Halldór Sigurður Guðmundsson, dósent og varadeildarforseti Félagsráðgjafardeildar, Sigurveig H. Sigurðardóttir, prófessor emerita í Félagsráðgjafardeild og Hervör Alma Árnadóttir, dósent og deildarforseti Félagsráðgjafardeildar. Í skýrslunni er farið yfir framkvæmd verkefnisins og dregnar saman helstu niðurstöður. Ljóst er að mörg námskeið eru kennd við háskóla á Íslandi þar sem fjallað er um öldrun og/eða málefni eldra fólks með einhverjum hætti. Ýmist er þetta efni meginefni námskeiðs, mikilvægt atriði í námskeiðinu eða komið er inn á efnið. Í töflum er birt yfirlit yfir 104 námskeið sem kennd eru við Háskóla Íslands, Háskólann á Akureyri, Háskólann á Bifröst og Háskólann í Reykjavík. Í viðaukum eru birtar ítarlegri upplýsingar fyrir alla háskóla á Íslandi. Á grundvelli samantektarinnar, er lagt til að Háskóli Íslands hafi frumkvæði að því að efna til fundar til að ræða hvort og hvar hugsanleg samlegð gæti legið með það í huga að koma á eða undirbúa samræmt og/eða sameiginlegt háskólanám í öldrunarfræðum. Skýrsla þessi er send til rektora allra háskóla á Íslandi og einnig til þeirra sem svöruðu tölvubréfi/tölvupósti með beiðni um upplýsingar um námskeið.