Próffræðilegir eiginleikar á matstæki er leggur mat á námsorðaforða íslenskra grunnskólanema

Abstract

Fjallað verður um greiningu á frumdrögum íslensks námsorðaforðaprófs fyrir nemendur á yngsta, mið- og unglingastigi. Byggt á nýjum lista yfir íslenskan námsorðaforða (LÍNO-2) hefur verið í þróun matstæki sem ætlað er að leggja mat á hver skilningur grunnskólanemenda er á íslenskum námsorðaforða. Greint verður frá niðurstöðum greiningar á úrtökum nemenda í 4. bekk (n = 175), 7. bekk (n = 126) og 9. og 10. bekk (n = 484), með 20 prófatriði í hverjum árgangi. Jafnframt verður fjallað um niðurstöður lóðréttrar skölunar (e. vertical scaling) sem byggir á 10 atriðum sem lögð voru fyrir í öllum árgöngum. Niðurstöður greiningar á hverjum aldurshópi fyrir sig benda til að bæta þurfi atriði í öllum árgöngum og bæta við léttari atriðum, einkum hjá yngri aldurshópum. Niðurstöður á sameiginlegum prófatriðum sýna að eiginleikar eru veikir í yngri árgöngum, einkum í 4. bekk. Stígandi er í skilningi nemenda á námsorðaforða frá 4. til 7. bekkjar, og milli 7. bekkjar og unglingastigs, en ekki milli bekkja á unglingastigi. Fjallað verður um tengsl algengi orða og þyngdarstigþeirra í úrtaki grunnskólanemenda.